Asociación Cultural Faceira

Carmilla, la novela qu’inspiróu a Bram Stoker na creación de Drácula, agora disponible en llionés

La obra inaugura la colección Lletras Universales de la nuesa asociación baixo’l sellu d’Eolas Ediciones. Esta novela curtia, publicada pol irlandés Joseph Sheridan Le Fanu en 1872, anuévase nuna traducción al llionés realizada por Xairu López, con ilustraciones de Ricardo Escobar y prólogu de Laura Collar. La obra presentaráse nos próximos días en Llión, Uviéu y Xixón.

Esta novela curtia, publicada en 1872 pol escritor irlandés Joseph Thomas Sheridan Le Fanu, foi traducida al llionés por Xairu López, autor de La Fueya Rota y outros relatos (2020). La obra, foi amás prologada por Laura Collar y ilustrada pol artesanu gráficu Ricardo Escobar, que ya contribuyera conas suas ilustraciones a numerosas publicaciones cumo Llión Máxicu, Los Reis de Llión ou Esbardu, vocabulariu llionés ilustráu.

Esta traducción, publicada por Eolas Ediciones, inaugura la colección Lletras Universales cona que la nuesa asociación finca l’obxectivu de poner a disposición de los lectores dalgunas de las obras más relevantes de la literatura universal traducidas a la llengua llionesa.

La novela curtia Carmilla ye una de las principales fontes de las que bebíu Bram Stoker pa crear la que quiciabes sía la figura más universal del terror fantásticu: Drácula. Esta inquietante historia de vampiros presenta por primer vez a estos cumo seres elegantes y atractivos, del mesmu xeitu aborda’l tema del erotismu y amor lésbicu nuna época na que la’argumentu abultaba fondamente controvertíu. La trama narra la historia de Laura y sou padre, habitantes d’un vieyu castiellu n’Estiria (Austria) xunto a los sous sirvientes. La sua tranquila y monótona vida cambia de repente cuando, frente a ellos, un carruaxe ocupáu por una muyer y por Carmilla, la sua formosa y xoven fiya, sufre un aparatosu accidente. Tres la decisión del padre de Laura de que la enigmática Carmilla quede no castiellu xunto a ellos hasta alitar del sucesu, ruchará entre las xovenes una relación d’amistá que trescala la llinia del más apasionáu amor en metá d’una riestra d’alarmantes feitos que xiran alredor del comportamientu de la recién chegada.

El llibru ya puede adquirise online a traviés de www.eolasediciones.com y está disponible en cualquier llibrería de referencia.

PRESENTACIONES

VII Cursu d’Iniciación a la Llengua y Cultura Tradicional Llionesas

AVISU IMPORTANTE:
Tódalas prazas disponibles del cursu ya está cubiertas
.

Calca eiquí p’acceder al programa detalláu cono link al programa

La nuesa asociación, cono patrociniu del Ayuntamientu de Llión, concretamente de la Conceyalía d’Acción y Promoción Cultural, cumpriendo cono sou compromisu cona defensa y promoción de la llengua y cultura llionesas, y ante l’exitu de los cursos llevaos a cabu los pasaos años, organiza’l sou séptimu cursu d’iniciación al nuesu idioma en modu presencial que vai tener llugar na ciudá de Llión, concretamente nas aulas de la consultoría de formación Skala, asitiada na calle Jorge de Montemayor, 6.

El cursu tendrá una duración total de 50 horas lectivas que s’impartirán cada vienres ente las 17,00 y las 19,00 horas, dende’l 11 de noviembre del presente añu hasta’l 26 de mayu de 2023. Las crases contarán cumo base de trabayu cona guía gramatical de llionés Xurdir y el manual prácticu d’iniciación Falar con Xeitu, editaos entrambos los dous pola nuesa asociación, amás d’outros materiales didácticos que serán entregaos a cada alumnu, cumo la guía didáctica La Cultura Leonesa, dientro’l preciu de matrícula. Xunto al aspectu concretamente lingüísticu, el cursu abordará tamién outras cuestiones cumo la literatura, historia, toponimia, mitoloxía, arquitectura tradicional, música y tradición oral; patrimoniu, encuestación, indumentaria tradicional ou comportamientos y costumes na sociedá llionesa; contando con profesores con fonda experiencia y competencia en cadagunu d’esos eiros.

Tódolos interesaos en matriculase pueden facelo en Skala Formación, calle Jorge de Montemayor, 6. El preciu de matrícula ye de numás un pagu únicu de 20 €. Las prazas son limitadas. Pa más información contactar na nuesa dirección de corréu asociacionfaceira@gmail.com

Llugar: Skala Formación, calle Jorge de Montemayor, 6.

Crases: Los vienres de 17,00 a 19,00 horas dende’l 11 de noviembre de 2022 hasta’l 26 de mayu de 2023.

Horas lectivas: 50.

Preciu: 20€ (pagu únicu)

Materias, horas y profesores:

  • Iniciación a la llengua llionesa – 30 horas (Xairu López).
  • Historia de la literatura en llengua llionesa – 2 horas. (Nicolás Bartolomé Pérez).
  • Mitoloxía llionesa – 2 horas (Ricardo Escobar).
  • Toponimia y mediu natural de Llión – 2 horas (Alejandro Díez).
  • La destrucción del patrimoniu llionés– 2 horas (Miryan Rodríguez).
  • ¿Qué ye la cultura llionesa? Características, costumes y comportamientos no substractu cultural cisastur – 2 horas (Xuan Getino).
  • Indumentaria tradicional llionesa – 2 horas (Laura Collar).
  • Historia del Reinu de Llión – 2 horas (Ricardo Chao).
  • Arquitectura tradicional llionesa – 2 horas   (Teresa García Montes).
  • Música y tradición oral llionesas – 2 horas (David Álvarez Cárcamo).
  • Sociolingüística y encuestación – 2 horas (Álvaro Lobato).

Añada: revista d’estudios llioneses (númaru 3)

Yá puede consultase la versión electrónica del númaru trés d’Añada: revista d’estudios llioneses, una publicación académica editada pola Asociación Cultural Faceira en colaboración cona “Cátedra de Estudios Leoneses” (CELe), na que, por primer vez en Llión, puede escribise en llionés. El númaru trés, que yá está disponible no repositoriu de revistas electrónicas de la Universidá de Llión (ULErevistas), recueye estudios de vexicoloxía, lingüística, sociopolítica, historia y música. Los artículos están firmaos por José Manuel Díez Alonso, Dennis Álvarez Guerrero, José Ignacio Torres Montesinos, Christian Fernández Chapman y Andrea García Torres. El volume, amás, vien rematáu con una recensión d’Iván Cuevas sobre’l llibru La lengua leonesa: literatura y textos. Cátedra de Estudios Leoneses-Universidad de León, de José Ramón Morala, Roberto González-Quevedo y Nicolás Bartolomé Pérez.

Fundada y dirixida pol llionés José Ignacio Suárez García, sociu de Faceira y profesor de musicoloxía de la Universidá d’Uvieo, Añada ye un annuariu interdisciplinar que recueye, a xeitu de coyeita añal, dalgunos de los fruitos producíos polas arias d’Artes y Humanidades centraos en temas llioneses. La revista, que cuenta con un Conseyu de Redacción y un Conseyu Asesor, reuníu alredor d’ella investigadores de prestixu nos sous respectivos campos de conocimientu que proceden d’universidades d’España, Francia, Austria, Portugal, México, Irlanda y Estaos Uníos.

Añada publica investigaciones, revisiones críticas y recensiones bibliográficas sobre cualquier aspectu históricu, xeográficu, lingüísticu ou cultural relacionáu con Llión, un términu que, por coherencia científica, ha d’entendese en sentíu latu, qu’atiende tamién –según los casos– a outros territorios relacionaos y vecinos. Amás, anque la llengua de la revista ye l’asturllionés, accéptanse tamién estudios nas –y sobre las– outras llenguas patrimoniales de Llión, esto ye, el castellanu y el gallegoportugués.

Portada del númaru trés d'Añada, revista d'estudios llioneses

Resume Calechos d’iviernu n’homenaxe a Eva González

Cumo nun podía ser d’outra manera, l’andanciu de COVID-19 marcóu la edición de los Calechos d’iviernu, entamaos por cuarta vuelta pola Asociación Faceira conxuntamente cono Ayuntamientu de Ḷḷión, dando continuidá, asina, a esta serie de actividades añales sobre cousinas d’eiquí que cheganon yá a la quinta edición.

Escomencipióu’l ciclu’l 6 de marzu del 2020 con una conferencia na que’l fichu de la homenaxeada, Roberto González-Quevedo, introdúxonos en requeixos pouco conocíos d’Eva cumo escritora, siempres dende una perspectiva fonderamente humana que chegóu a emocionar a un públicu que chenóu completamente la sala, hasta alcanzar el cientu’l númaru d’asistentes.

Malapenas una sumana espués, hubo qu’atachar la edición por mor del confinamientu, yá que quedanon aparadas tódalas actividades presenciales. Asina, tuvo que se retomar el restu del ciclu no mes de febreiru del 2022, cona capacidá máxima de la sala limitada namás qu’a 40 personas. Na primer actividá, una mesa redonda sobre «El xurdimientu literariu del ḷḷionés», Xairu López, Francisco González-Banfi, Rubén García ya Iván Cuevas reflexionanon ya expusienon los sous respectivos puntos de vista sobre’l sentíu d’escribir actualmente en ḷḷionés, qué facer pa incentivar la producción nesta ḷḷingua, qué papel tien que xugar cumo elementu de normalización lingüística, qué temáticas deben abordase na literatura en ḷḷionés, cuála yía la situación al respective de los sous estudios, cuálas son las influencias de la literatura casteḷḷana ya asturiana na literatura ḷḷionesa, qué fórmulas podrían manexase d’empléu del ḷḷionés n’obras escritas en casteḷḷanu, cuála yía la situación en Zamora ou cuála yía la súa valoración de la producción d’Eva Gonzalez, entre outros temas. La sala chena, ya eso qu’esi día había na ciudá muito bien d’actividades a la mesma hora, entre eḷḷas, un conciertu, una conferencia de música ya la presentación d’un ḷḷibru sobre l’autonomía de Ḷḷión.

Nicolás Bartolomé fixo un repasu sobre «El xurdimientu literariu del ḷḷionés (1980-2020)», una miente que tien trabachada abondo ya que foi obxetu recién d’una publicación (CELe, 2021). Na súa briḷḷante conferencia, Bartolomé encalcóu la importancia de la producción ḷḷionesa de los últimos cuarenta anos ya cúmo ésta sigue medrando na actualidá, con bien de nomes que convidan a pensar en positivo ya con ciertu optimismu. La sala chena casimente: 37 personas.

El grupu musical D’Urria, compuestu por José Manuel Sabugo ya Dani Álvarez, tocóu un conciertu no que pudimos oyir mui bien de cantares con ḷḷetra ḷḷionesa d’Eva González ya Emilce Núñez, entre outros autores. El públicu, que chenóu la sala, salíu contentísimu ya emocionáu espués de sentir los sones ya los cantaríos oufrecíos por estos músicos excelentes.
Réstanos, namás, da-ḷḷy las gracias a tódolos intervinientes ya, tamién, a tódolos asistentes a las charlas, naguando porque foran del sou interés ya convidándo-ḷḷys tamién a qu’acudan a la próxima edición, que yá tamos entamando.

VUELVEN LOS CALECHOS D’IVIERNU 2020, HOMENAXE A LA ESCRITORA EVA GONZÁLEZ

Cartel de los Calechos d'Iviernu 2020

El vienres 4 de febreiru escomencipian las xornadas culturales tituladas Calechos d’iviernu, entamadas pola Asociación Cultural Faceira ya l’Ayuntamientu de Ḷḷión. Aguano continúase la edición aparada no 2020 por mor del andanciu de Covid-19, asina qu’esti añu’l ciclo retoma’l proyectáu homenaxe a la escritora ḷḷionesa Eva González (2018-2007). No 2020 cumplíanse 40 anos de la publicación del ḷḷibru Poesías ya cuentus na nuesa l.lingua (1980), escritu por Eva González Fernández ya’l sou fichu Roberto González-Quevedo González, que foi’l primer volume d’una importante producción literaria que revitalizóu la escritura d’esta viecha ḷḷingua non solo no noroccidente ḷḷionés, senón tamién no restu de Ḷḷión ya no occidente asturianu, onde estos autores palaciegos ḷḷogranon una enorme popularidá. Con estos Calechos d’iviernu 2022 dedicaos a la memoria d’Eva González, queremos poner en valor la sua obra pola sua excepcional importancia na recuperación del cultivu escritu de la nuesa ḷḷingua.

El calechu yera una reunión típica de los pueblos de la montaña noroccidental ḷḷionesa, concretamente de las comarcas de Ribas de Sil, Ḷḷaciana, Babia, Oumaña, Ḷḷuna, Ordás ya El Bierciu, onde se conoz cono nome de caleyu. Al cabu la tarde, axuntábanse varios vecinos ya/ou achegáos na caḷḷe –se’l tiempu lo permitía– ou na cocina d’unu d’eḷḷos, cono propósitu de pasar d’un xeitu prestosu un buen ratáu antias de cenar nas ḷḷargas tardes d’iviernu, estación na qu’había menos que faer que n’outras épocas del anu. Parez que tantu’l vezu cumo’l términu tienen el sou orixe nas xuntanzas que se faían antano pa repartir las velías de caltenimientu, cebáu ya andar al pesque de las trapas pa ḷḷobos, chamadas calechos, asina cumo determinar outros detaḷḷes d’eḷḷas. El calechu yera principalmente una tertulia na que se comunicaban las anuncias de la vida diaria, anque tamién podía xugase a las cartas ya contase historias divertidas, cuentos ya cousiḷḷinas, estas últimas dedicadas especialmente a los rapaces. Tamién yera’l momentu no que s’acordaba áu s’axuntarían pola nueite pal filandón anque, estremáu d’ésti, no calechu nun se solía trabachar ya, por tanto, tenía un aquel mayormente lúdicu, d’ehí’l protagonismu de la xente moza en muitos casos. Pero amás d’engayolar, dacuando’l calechu tenía un ḷḷau pedagóxicu, yá que yera aproveitáu polos pais pa deprender a los sous fíchos cousas de la escuela.

Cona celebración de los Calechos d’iviernu, l’Asociación Cultural Faceira ya la Conceyalía d’Acción ya Promoción Cultural del Ayuntamientu de Ḷḷión non solo rinden homenaxe a esta costume, senon qu’intentando xuntar esparcemientu ya educación, buscan emponderar ya difundir una parte del gran patrimoniu cultural ḷḷionés al traviés de una conferencia, un conciertu ya una mesa redonda alredor de la escritora Eva González ya la producción literaria en ḷḷionés con esti programa:

04/02/2022. Mesa redonda: “La creación literaria en ḷḷionés: presente ya futuru”.

  • Xairu López (Ḷḷión)
  • Francisco González-Banfi (Palacios, Ḷḷión)
  • Rubén García (Zamora)
  • Iván Cuevas (Xixón, Asturias)

11/02/2022. Nicolás Bartolomé (Ḷḷión): “El xurdimientu literariu del ḷḷionés (1980-2020)”.

18/02/2022. José Manuel Sabugo Álvarez ya grupu D’urria (Ḷḷaciana, Ḷḷión): “La nuesa ḷḷingua puesta en música” (Conciertu).

Tódalas intervenciones son de vienres ya principian a las 19:30 horas no Palaciu del Conde Ḷḷuna (Praza del Conde Ḷḷuna, 24003, Ḷḷión)

Dirección ya coordinación: José Ignacio Suárez García

La Asociación Cultural Faceira presenta su guía didáctica sobre La Cultura Leonesa

El próximo martes, día 21 de diciembre de 2021, tendrá lugar a las 20,00 h. en el Instituto Leonés de Cultura (Calle Santa Nonia 3, León), la presentación de la guía didáctica La Cultura Leonesa, una obra de la Asociación Cultural Faceira pensada para que jóvenes y adultos, a través de once unidades, puedan conocer algunos de los aspectos más básicos de la cultura tradicional leonesa: la agricultura, la arquitectura rural, la música, la mitología, las canciones, la indumentaria, la gastronomía, los concejos, las tradiciones, las lenguas leonesa y gallega, las fiestas… En definitiva, aquello que conforma e identifica a los leoneses como pueblo. Las atractivas ilustraciones, las lecturas recomendadas, las visitas y actividades propuestas, hacen de la publicación una original guía didáctica imprescindible para entender y valorar la importancia del patrimonio material e inmaterial que atesora León.

Cartel de presentación de La Cultura Leonesa de la Asociación Cultural Faceira

La guía didáctica La Cultura Leonesa, que ha sido editada por Cultural Norte y publicada con el apoyo de la Diputación de León y el Instituto Leonés de Cultura, se ha llevado a cabo bajo la coordinación del investigador Nicolás Bartolomé Pérez y, cada una de sus unidades, viene acompañada por las hermosas ilustraciones de Ricardo Escobar Espiniella, que ya participó de igual manera en obras anteriores tan representativas como Los Reis de Llión, Llión en Ruta, Llión Máxicu o Esbardu, vocabulariu llionés ilustráu; corriendo la redacción de cada uno de los apartados de mano de los siguientes coautores:

  • Arquitectura tradicional – María Teresa García Montes
  • Agricultura y ganadería – José A. Serrano Álvarez
  • Gastronomía – Beatriz Blanco Fontao
  • Patrimonio oral – Nicolás Bartolomé Pérez
  • Música tradicional – José Ignacio Suárez García
  • Patrimonio lingüístico – Xairu López Jáñez
  • Concejos y juntas vecinales – Ricardo Chao Prieto
  • Deportes y juegos tradicionales – Nicanor García Álvarez
  • Trajes e indumentaria – Ricardo Escobar Espiniella
  • Tradiciones y costumbres – Xepe Valle Carrera
  • Ciclo festivo – Iván Martínez Lobo

Los intervinientes en la presentación serán Nicolás Bartolomé Pérez en calidad de coordinador, Teresa García Montes como maquetadora y coautora, Ricardo Chao Prieto como Presidente de la Asociación Cultural Faceira y coautor y Pedro Moreno, editor de la obra.

¡Os esperamos!

 

Añada: revista d’estudios llioneses (númaru 2)

Yá puede consultase la versión electrónica del númaru dous d’Añada: revista d’estudios llioneses, una publicación académica editada pola Asociación Cultural Faceira en colaboración cona “Cátedra de Estudios Leoneses” (CELe), na que, por primer vez en Llión, puede escribise en llionés. El númaru dous, que yá está disponible no repositoriu de revistas electrónicas de la Universidá de Llión (ULErevistas), recueye estudios d’historia, tradición oral, historiografía, dereitu comparáu y lingüística. Los artículos están firmaos por Beatriz García Prieto, Ana Cristina Rodríguez Guerra, David Álvarez Cárcamo, Andrés Altés Domínguez, Alberto Flecha, Nicolás Bartolomé y Iván Cuevas. El volume, amás, vien rematáu con una recensión de José Manuel Pedrosa sobre’l llibru La tradición oral leonesa: Antología sonora del romancero, de David Álvarez Cárcamo.

Fundada y dirixida pol llionés José Ignacio Suárez García, sociu de Faceira y profesor de musicoloxía de la Universidá d’Uvieo, Añada ye un annuariu interdisciplinar que recueye, a xeitu de coyeita añal, dalgunos de los fruitos producíos polas arias d’Artes y Humanidades centraos en temas llioneses. La revista, que cuenta con un Conseyu de Redacción y un Conseyu Asesor, reuníu alredor d’ella investigadores de prestixu nos sous respectivos campos de conocimientu que proceden d’universidades d’España, Francia, Austria, Portugal, México y Estaos Uníos.

Añada publica investigaciones, revisiones críticas y recensiones bibliográficas sobre cualquier aspectu históricu, xeográficu, lingüísticu ou cultural relacionáu con Llión, un términu que, por coherencia científica, ha d’entendese en sentíu latu, qu’atiende tamién –según los casos– a outros territorios relacionaos y vecinos. Amás, anque la llengua de la revista ye l’asturllionés, accéptanse tamién estudios nas –y sobre las– outras llenguas patrimoniales de Llión, esto ye, el castellanu y el gallegoportugués.

Ya disponible La Fueya Rota y outros relatos, de Xairu López

 

El pasáu vienres, 21 de febreiru de 2020, Día Internacional de la Llengua Materna, tuvo llugar nel Ateneo Varillas de la ciudá de Llión la presentación del llibru La Fueya Rota y outros relatos, obra de Xairu López cona que la nuesa asociación inaugura BARDÓN, colección de narrativa llionesa, una nueva iniciativa cultural na qu’apostar pola prosa literaria en llengua llionesa.

L'Ateneo Varillas a lo llargo de la presentación de La Fueya Rota y outros relatos de Xairu López

La Fueya Rota y outros relatos, de Xairu López, ye un llibru qu’axunta ocho relatos escritos en llionés, ficciones que se mueven principalmente dientro de los xéneros del drama y el suspense y que se presentan mostrando la pluralidá lingüistica del nuesu idioma, a traviés de diversas variedades del mesmu cumo’l cabreirés, senabrés ou pal.luezu.

A lo llargo de la presentación intervinieron Pedro Moreno (editor, de la editorial leonesa Cultural Norte), Nicolás Bartolomé Pérez (prologuista) y Xairu López (autor).

El llibu ya s’alcuentra disponible en tódalas llibrerías de referencia de la ciudá de Llión. Esperamos que vos preste.

Filandón Mitolóxicu en Cazurra Brew Pub

El próximu vienres, 28 de diciembre de 2018 a las 20,30 horas, la nuesa asociación desenvolverá en Cazurra Brew Pub, fábrica de cerveza artesana asitiada na Calle Arquitecto Lázaro 6 de Llión (xunto a la muralla de Puerta Moneda), un Filandón Mitolóxicu onde faremos un curiosu repasu a una buena pila de personaxes mitolóxicos llioneses que de xuru prestará pola vida.

La entrada será llibre hasta chenar aforu. ¡Nun vos lo perder!

Resume Calechos d’iviernu 2017

El pasáu vienres, marzu y 17, terminoron los Calechos d’iviernu de 2017. Tres la esperiencia de 2016, y por primer vez, la edición d’esti añu foi entamada pola Asociación Faceira conxuntamente col Ayuntamientu de Llión, despuéis de chegar a un conveniu que tenta puxar y dar continuidá a esta serie conferencias sobro cousinas d’eiquí.

Cona súa típica sabencia, Javier Emperador falóu de la indumentaria tradicional no Camín de Santiagu en Llión, tresportando al auditoriu nun viax al traviés del tiempu y del espaciu, nún reconfortante recorríu pola muestra de traxes espuesta na antigua Casa’l Conceyu, asitiada na popular praza de las palombas de la capital llionesa.

Yá no Palaciu del Conde Lluna, siguíu’l ciclu con una charra de Fran Allegre sobro los instrumentos llioneses más característicos, despregando na sala bien d’ellos, muitos los cuales foron construyíos por él mesmu.

Darréu Héctor Xil díu una desplicación nidia de la trayectoria la lliteratura en llionés, dende la Edá Media dica güei, encalcando’l cambiu d’intención nos escritores na nuesa llingüa dende Eva González p’acá, de tal xeitu que, dende una actitú que tentaba reflexar las falas tradicionales cumo una curiosidá ou tipismu, pasóuse a una intencionalidá crara de facer lliteratura, ye dicir, ellaborar una creación artística con aspiraciones estéticas.

Na cabeira charra, Iván Martínez anduvo polas principales mazcaradas d’iviernu de la provincia de Llión, falando maxistralmente d’estas manifestaciones qu’él mesmu lleva años recuperando, y dexando nos presentes un magníficu sabor de boca.

L’auditoriu mostróu gran interés sobro tódolos temas, faciendo dalgunas intervenciones bien interesantes. Outramiente, el públicu foi de menos a más: houbo cerca de 25 asistentes na primer charra, que medraron hasta los 35 nas dúas del mediu, pa rematar con dalgo más de 40 na postrer. Anque gustaríanos qu’esti númaru fuera mayor, dende estas llíneas l’Asosicación Faceira quier aproveitar pa dar efusivamente las gracias a tódolos asistentes, convidándo-ys, la mesmu tiempu, a la prósima edición que yá estamos entamando.

Hasta’l prósimu añu.