I Certame lliterariu Astúrica

Pasoron más de cien años dende que Menéndez Pidal escribíu “El Dialecto Leonés”, y nesi tiempu esta llingua sufríu tal retrocesu nas provincias de Llión y de Zamora qu’hasta la UNESCO alertóu sobre la posibilidá de que desapareza. La sua situación nun ye tan dramática n’Asturias y en Portugal (onde recibe’l nome de “mirandés”), ya qu’eillí se tomoron mididas mui activas pa la sua preservación y difusión.
Nel artículu 5.2 del Estatutu d’Autonomía de Castiella y Llión recuéyese que “el llionés será oxetu de protección específica por parte de las instituciones” y que la “sua protección, usu y promoción serán oxetu de regulación”, pero l’alministración autonómica amosóu un total desinterés por esta llingua, quedando la sua defensa y protección en manos de los ciudadanos.
Para rumediar esta situación, l’Asociación Cultural Faceira lleva dous años organizando conferencias y xornadas sobre’l llionés, denunciando la sua situación llegal ante organismos europeos, y publicando llibros sobre y nesta llingua, cumo “Xurdir”, que constituye la primeira gramática publicada de llionés, y el más recien “Mitoloxía popular del reinu de L.lión”.
Agora, y en collaboración col Exmu. Ayuntamientu d’Estorga, convócase’l I Certame Lliterariu “Astúrica”, en dúas modalidades, relatu curtiu y poesía, qu’esperamos que contribuya a la divulgación y dignificación del llionés.
La elección d’Estorga nun foi accidental, pues afállase prácticamente nel centru del actual dominiu lingüísticu asturllionés. Amás, esta ciudá, col nome d’Astúrica Augusta, foi la capital del Conventus Asturorum nos tiempos de la dominación romana, qu’axuntaba la mayor parte de las actuales provincias d’Asturias y Llión, asina cumo la metá occidental de Zamora y la Tierra de Miranda portuguesa. Estos territorios coinciden na práctica col núcleu central de la lligua asturllionesa, y por ello creyemos qu’Estorga tien que xugar un importante papel na sua preservación y difusión.
 

certame lliterariu asturica cartel copia

Bases (llionés)

L´Asociación Cultural Faceira y la Conceyalía de Cultura del Excelentísimu Ayuntamientu d´Estorga presentan el I Certame lliterariu Astúrica.

  1. Pueden participar tódolos ciudadanos de la Unión Europea a títulu individual y con un únicu trabayu por modalidá (relatu/poesía) a nun ser los miembros de l’asociación Faceira, que cumo (co)organizadores del Certame nun pueden participar nel mesmu.
  2. Los trabayos han d’estar escritos en llionés; almítense en cualquiera de las variedades dialectales del dominiu llingüísticu asturllionés.
  3. La temática ye llibre.
  4. La obra ha ser orixinal, inédita y non galardonada anteriormente en nengún concursu lliterariu nin con outru premiu o distinción.
  5. Na forma, almítense dúas modalidaes: relatu breve y poesía.
  6. La extensión mínima del poemariu ye de 100 versos y la máxima de 250.
  7. La extensión máxima del relatu curtiu ye de 8 páxinas.
  8. La presentación tien que s’axustar a las normas que vienen arréu:
    • Cuatro copias en formatu DIN A4 escritas en lletra Times New Roman 12, máximu 30 llíneas por páxina, márxenes de 2’5 centímetros, impresas por una sola cara y una copia informática del testu.
    • Las páxinas debidamente enumaradas y grampadas.
    • Na portada consignaráse, únicamente: CERTAME LLITERARIU ASTÚRICA 2013, (POEMAS / RELATU CURTIU) el títulu de la obra y el pseudónimu del autor.
    • Nun sobre zarráu identificáu col seudónimu y títulu del trabayu, incluiráse una ficha colos datos del participante, (nome y apellidos, señas completas, corréu electrónicu y teléfonu de contactu) y una fotocopia del DNI.
  9. El prazu de presentación acaba’l 31 de diciembre de 2013 y los trabayos tienen que s’unviar a:
    • Certame lliterariu Astúrica Concejalía de Cultura Plaza Mayor s/n C.P. 24.700 (Astorga) – Biblioteca Pública de Astorga C/Luís Braille s/n C.P. 24.700 (Astorga)
  10. Considéranse recibidos dientro de prazu los trabayos que lleven nel matasellos postal una fecha non posterior a l’amentada. Nun s’almiten trabayos unviaos por corréu electrónicu.
  11. El Xuráu formaráse por destacadas personas del ámbitu de la cultura. La composición del mesmu daráse a conocer oportunamente y ye competente pa decidir sobre cuestiones relativas a esti Certame y que nun figuren espresamente nestas Bases. El secretariu de Faceira actúa cumo secretariu del Xuráu con voz y sin votu.
  12. El fallu del Xuráu daráse a conocer el mesmu día de la entrega de premios, n’actu públicu. Los premiaos habrán presentase a recoyelos nel momentu d’entrega de los mesmos o delegar nuna segunda persona. No casu de nun se presentar perderán la parte económica del premiu.
  13. Los participantes eximen a Faceira de cualquier responsabilidá derivada del plaxu ou cualquier outra tresgresión de la llexislación vixente na que pudieran incurrir los participantes.
  14. Faceira resérvase por cuatro años el dereitu n’esclusiva de la edición de los trabayos premiaos, al igual que los beneficios que puedan siguise arréu.
  15. El xuráu resérvase la facultá de declarar los premios ermos en casu de considerar que la calidá de los trabayos nun chega al mínimu esixible.
  16. Establécense los siguientes premios:
    • 200 € (brutos) al primer premiu de relatu curtiu.
    • 100 € (brutos) al segundu premiu de relatu curtiu.
    • 50 € (brutos) al tercer premiu de relatu curtiu.
    • 200 € (brutos) al primer premiu de poesía.
    • 100 € (brutos) al segundu premiu de poesía.
    • 50 € (brutos) al tercer premiu de poesía.
  17. La presentación al Certame implica l’aceptación de las bases. Cualquier circunstancia non prevista nas mesmas resolveráse de forma inapelable por parte del xuráu.
  18. Los premios entregáranse n’actu públicu nuna fecha que s’anunciará previamente.

Bases en Castellano

Una respuesta en “I Certame lliterariu Astúrica

  1. Pingback: ¿Falas llionés?… enfréntate a un reto | Tierra alantre, la mesma fala

Deja una respuesta

Tu dirección de correo electrónico no será publicada. Los campos obligatorios están marcados con *