La Conceyalía d’Acción y Promoción Cultural del Ayuntamientu de Llión, a traviés del sou Departamentu de Cultura Llionesa y en colaboración cona Asociación Cultural Faceira, entama un cursu online de Llengua y Cultura Tradicional Llionesa col envís de poner en valor la cultura autóctona.
El cursu desenvolveráse a lo llargo d’una riestra de diez vídeos monográficos, con una duración d’entre veinti y treinta minutos cadagunu, nos cualos, amás de llengua llionesa, trataránse temas cumo mitoloxía, historia del Reinu de Llión, música tradicional, literatura en llengua llionesa y arquitectura tradicional.
Los vídeos publicaránse na canal oficial de Youtube del Ayuntamientu de Llión cada aproximadamente trés ou cuatro sumanas. El primeiru d’ellos ya está disponible nesti enganche: https://youtu.be/mSeKkIz8OHY
Amás, con esta iniciativa preténdese contribuir a torgar la inevitable reducción d’actividá en materia de cultura tradicional por mor de los efectos de la crisis derivada de la Covid 19.
