«In crescendo». Esti podría ser el titular d’un diariu pa resumir los Calechos d’iviernu de 2019, que terminoron el pasáu vienres 22 de marzu. Por tercer vez foron entamaos pola Asociación Faceira conxuntamente cono Ayuntamientu de Llión, dando continuidá, asina, a esta serie de conferencias añales sobre cousinas d’eiquí que, cona presente, chegoron yá a la cuarta edición.
El titular d’enantes, «In crescendo», débese principalmente a trés cousas. En primer llugar, al incrementu d’asistentes, que pasoron de las 175 personas alcanzadas nas sesiones de 2018, a las 194 d’aguaño, lo cual supón un incrementu de casi un 11% respetive al añu pasáu, y esu a pesar de que dalguna de las conferencias coincidíu con outras actividades que, ensin duda, restoron públicu. Lo dicho confirma la tendencia que señalemos no nuesu postrer resume, ye dicir, que’l ciclu definitivamente queda asentáu cumo una actividá cultural bien del gustu de los llioneses, polo cual creyemos qu’estamos de norabuena. Outra cousa a tener en cuenta ye que, respetive al añu anterior, el númaru de xente que acudíu a las charlas foi muitu más constante, con cifras que’n tódolos casos superoron los 40 asistentes y con un promedio de 48,5 personas por conferencia. Finalmente, y pareznos el mayor llogru, la participación de la xente foi espectacular. Tanto ye asina que tódolos días l’encargáu del Ayuntamientu tuvo que zarrar l’edificiu más tarde de las nueve la nueite (hora oficial), viéndonos na obrigación de dar por terminadas las cuatro sesiones enantes de que pudieran expresase tódalas inquietudes que las intervenciones de los conferencianes despertaran entre’l públicu. Dende estas llinias queremos da-y las gracias al personal que, de xeitu tan xenerosu, atendíonos no Palaciu Conde Luna.
Cona sala chena (55 personas), David Álvarez Carcamo trazóu un panorama xeneral sobre la tradición oral en Llión. Con unas excepcionales dotes comunicativas, Álvarez tocóu temas cumo qué ye la tradición oral, ónde aparez y quiénes son los sous transmisores y depositarios. Despuéis, encalcóu que la provincia de Llión ye un casu especialmente ricu y bien documentáu, anque, sicasí, quedan muitas cousas por facer. Y ye que, a pesar de la importancia d’esi ricu patrimoniu inmaterial, gran parte de los archivos sonoros que rexistran toda esa tradición oral nun estan disponibles entovía n’abiertu pa todu’l mundu. Na última parte de la sua conferencia, chamóu l’atención sobre la necesidá de siguir recoyiendo los postreiros borrayos de la tradición viva, poner a disposición de la xente materiales d’audio y vídeo, crear estratexas d’esparcimientu cona colaboración d’instituciones y el mundiu del enseñu y, por últimu, entamar un archivu únicu qu’ arrequede los esfuercios individuales.
Con dalgo menos d’entrada (43 personas), por coincidir cona manifestación del 8 de marzu, Andrés Altés Domínguez falóu sobre’l discursu esencialista montáu sobre la corona de Castiella, el cual foi entamáu en gran medida por oposición al reinu de Llión. De reiz medieval y literaria, esta construcción historiográfica sufríu un fuerte emburrión no pasu de los siegros XIX al XX, de manu de personalidades cumo Joaquín Costa ou Ramón Menéndez Pidal, chegando a un puntu cimeiru cona dictadura de Franco, y la celebración, en 1943, del milenariu de la supuesta independencia del condáu de Castiella del reinu de Llión, dalgo calteníu despuéis na Posguerra franquista. Aguaño, va tiempu qu’esti mitu está desmontáu pola historiografía, pues ye bien conocíu que la mentada independencia nun foi tal hasta pasada la segunda mitá del siegru XII. Sicasí, esti xeitu de discursu esencialista, sobre una Castiella resume de tódolos valores positivos de «la nación española», tristemente pervive na literatura non académica, onde tamién se caltién el mitu de la independencia de Castiella no siegru X. El conferenciante ilustróu la sua exposición con fotos bien prestosas, asina cumo con un exemplu buenísimu sacáu de la película «El valle de las espadas» (1963).
La conferencia de Santiago Pérez Fernández, «Rasgos del llionés na fala y toponimia d’Antoñán», contóu cona presencia de 49 personas. D’un xeitu craru y didácticu Pérez establecíu los ragos principales de la fala del sou llugar de ñacencia respetive al vocalismu, al consonantismu, a la morfoloxía y a la sintaxis. El públicu reconocíuse dafeitu cono dicho al comprobar las asemeyanzas con outras zonas de fala llionesa y, nesti sen, no debate final hubo quien arremellóu al decatase de que la fala tradicional d’Al Fabeiru (El Bierciu) nun ye’l gallegu, senon l’asturllionés. Dende lluegu, el llabor que queda por facer nesa parte de Llión ye toda, porque’l desconocimientu entre la xente ye total. Outramiente nun ayuda pa ello la postura adoptada pol Conseyu Comarcal, que nun ta faciendo nada por poner en valor una de las suas llenguas tradicionales.
Zarróu la serie Carlos Javier Salgado Fuentes, qu’ante 47 personas fizo un repasu de la esbarrumbada situación llionesa actual. Tras recordar qué ye y cuáles son los dereitos de la rexón llionesa, asina cumo los problemas habíos na creación de «Castilla y León», constatóu qu’un fuerte desapegu a l’autonomía sigue plenamente vixente nas tres provincias llionesas, y especialmente en Llión, onde’l rechazu al ente administrativu supera’l 50% de la xente, según datos de la postrer encuesta d’Electomanía (xineiru de 2019). Na segunda parte de la conferencia, encalcóu la desastrosa evolución económica y demográfica de la rexón llionesa dientro de l’autonomía (1983-2018), una situación que pinta pior, entovía, al facer la comparanza cona parte castellana del territoriu. Nesti sen, chamóu poderosmente l’atención del auditoriu que, pa esi periodu, Castiella perdíu numás que’l 2% de la sua población, mientras que Llión perdiú’l 13%. Visto n’outros términos, la rexón llionesa contabilizóu’l 82% de la pérdida de población de toda l’autonomía, lo cual supón la pior evolución de todo’l Estáu. Datos sobre’l desigual repartu de recursos entre las dúas rexones que componen l’autonomía (funcionarios, infraestructuras, etc.) y outros sobre la mengua de población y poder políticu, asina cumo sobre despoblación, enveyecimientu, paru llaboral, renta per cápita, PIB, emigración, etc., llevoron a Salgado a proponer la creación d’una autonomía llionesa cumo meyor solución pa manexar los recursos propios, pa poder optar a ayudas europeas y priorizar las relaciones con Extremadura, Asturias, Galicia y Portugal.
Réstanos, numás, da-ys las gracias a tódolos conferenciantes y, tamién, a tódolos asistentes a las charlas, naguando porque fueran del sou interés y convidándo-ys, al mesmu tiempu, a que siguan siendonos fieles na próxima edición, que yá estamos entamando.
Hasta’l próximu añu.