El pasáu 22 de xineiru de 2024 l’Asociación Cultural Faceira solicitóu ⸻n’exerciciu del dereitu constitucional de petición⸻, a la Deputación Provincial de Llión y al Ayuntamientu de Llión que procedieran, respectivamente, a regular oficialmente tanto la bandera cumo l’escudu provincial y municipal, ya que carecen d’esta regulación, onque sí existen banderas y escudos oficiosos de los que las suas configuraciones van variando no tiempu ensin criterios craros.
L’antigüedá del llión heráldicu cumo símbolu de Llión (del reinu, de la sua monarquía, de la rexón, de la provincia, de la ciudá de Llión y finalmente del propiu puebru llionés), asina cumo la sua pervivencia, evolución y incorporación a las banderas y escudos d’España y de la Comunidá Autonoma de Castiella y Llión, son feitos incuestionables. El llión heráldicu representóu a Llión, a lo llionés y a los llioneses a lo llargo de siegros, polo que’l sou valor simbólicu, patrimonial y afectivu pal puebru llionés amerita un tratamientu regulatoriu rigurosu y dignu, cumo’l que ya tienen las banderas y escudos de la gran mayoría de los municipios y provincias del nuesu país.
Por ello Faceira solicitóu a estas administraciones que, siguiendo los calces legales previstos pa ello, dicten la normativa que regule la configuración, dimensión, proporción, cromatismu y usos oficiales de la bandera y del escudu provincial y municipal de Llión, requiriendo nesi sentíu los informes correspondientes.