Calca eiquí p’acceder al programa detalláu
L’asociación Faceira en colaboración cona Universidá de Llión y los sous Cursos d’Extensión Universitaria, y cumpriendo cono sou compromisu en defensa y promoción de la llengua y cultura llionesas, y ante l’exitu de los cursos llevaos a cabu los pasaos años, organiza’l sou octavu cursu d’iniciación al nuesu idioma y cultura tradicional que vai tener llugar na Sala de Conferencias de la Biblioteca Central San Isidoro del Campus de Vegazana de la ciudá de Llión. El cursu, d’un total de 50 horas lectivas, tendrá llugar cada xueves entre las 18,00 y las 20,00 horas, dende’l 4 de diciembre de 2025 hasta’l 18 de xuniu de 2026.
Las crases de llengua contarán cumo base de trabayu cona guía gramatical de llionés Xurdir y el manual prácticu d’iniciación Falar con Xeitu, editaos entrambos los dous pola nuesa asociación, que serán entregaos a cada alumnu dientro del preciu de matrícula.
Xunto al aspectu concretamente lingüísticu, al que s’adicarán 30 horas, el cursu abordará a lo llargo d’outras 20 horas cuestiones cumo la literatura, historia, toponimia, mitoloxía, arquitectura tradicional, música, encuestación, patrimoniu, indumentaria tradicional y comportamientos y costumes na sociedá llionesa; aspectos onde la nuesa llengua siempre xugóu un papel fundamental, acutandose dúas horas a cadagunu d’estos aspectos y contando nellos con un profesoráu con fonda competencia y experiencia en cada eiru.
Tódolos interesaos en matriculase podrán facelo dende’l día 28 de noviembre de 2025 a traviés de la siguiente páxina web: https://extensionuniversitaria.unileon.es/cursos-y-matriculas. El preciu del cursu ye d’un pagu únicu de 40€ en matrícula ordinaria y 20€ pa estudiantes universitarios (Actividá reconocida con 3 creitos ECTS). Las prazas son limitadas.
Pa más información contactar na nuesa dirección de corréu asociacionfaceira@gmail.com
Matrícula: Dende’l 28 de noviembre de 2025 na páxina web https://extensionuniversitaria.unileon.es/cursos-y-matriculas. PRAZAS LIMITADAS.
Llugar: Biblioteca Central San Isidoro (Campus de Vegazana, Llión)
Crases: Los xueves de 18,00 a 20,00 horas dende’l 4 de diciembre de 2025 hasta’l 18 de xuniu de 2026.
Horas lectivas: 50 (30 de llengua y 20 de cultura tradicional).
Preciu: 40€ en matrícula ordinaria y 20€ estudiantes universitarios (pagu únicu, incluye material didácticu, l’actividá está reconocida con 3 creitos ECTS).
Materias, horas y profesores:
- Iniciación a la llengua llionesa – 30 horas (Álvaro Rosales, Ricardo Escobar y Xairu López).
- Historia de la literatura en llengua llionesa – 2 horas. (Nicolás Bartolomé Pérez).
- Mitoloxía llionesa – 2 horas (Ricardo Escobar).
- Toponimia y mediu natural de Llión – 2 horas (Alejandro Díez).
- La destrucción del patrimoniu llionés– 2 horas (Miryan Rodríguez).
- ¿Qué ye la cultura llionesa? Características, costumes y comportamientos no substractu cultural cisastur – 2 horas (Xuan Getino).
- Indumentaria tradicional llionesa – 2 horas (Laura Collar).
- Historia del Reinu de Llión – 2 horas (Ricardo Chao).
- Arquitectura tradicional llionesa – 2 horas (Teresa García Montes).
- Música y tradición oral llionesas – 2 horas (David Álvarez Cárcamo).
- Sociolingüística y encuestación – 2 horas (Álvaro Lobato).