En 2012 l’Asociación Cultural Faceira publicóu una pequeña gramática del llionés titulada Xurdir. Guía gramatical de leonés de la que se tiroron varias ediciones y reimpresiones. Tres años más tarde aparecíu Falar con Xeitu. Manual prácticu d’iniciación al llionés, obra del nuesu compañeiru Xairu López, que ye un manual destináu a apoyar las crases de llionés qu’organiza l’asociación. El Diccionariu Llionés no que trabayamos dende hai un tiempu está ya na fase de corrección, y confiamos en qu’estea nas llibrerías no primer semestre de 2018. Pero agora queremos anunciar la publicación d’Esbardu. Vocabulariu llionés ilustráu que da continuidá al llabor d’ofrecer obras divulgativas y didácticas que contribuyan a la recuperación de la nuesa llengua, especialmente entre la mocedá.
Esbardu. Vocabulariu llionés ilustráu ye un llibru con prestosos dibuxos a color, del ilustrador llionés Ricardo Escobar, pensáu pa que los más pequeños puedan conocer el léxicu básicu del llionés sobre’l cuerpu, la ciudá, la casa, el tiempu, los animales, los árboles, los oficios, los alimentos ou dalgunos elementos esenciales de la cultura popular llionesa. La obra complétase con una lista alfabética de las palabras recoyidas no llibru xunto conas suas variantes nas principales variedades lingüísticas llionesas y las suas equivalencias en castellanu.
Esbardu está presente ya nas llibrerías llionesas.