De llengua y literatura llionesas
Siguiendo la sienda qu’entamemos l’añu pasáu, la edición d’aguaño estuvo dedicada una vuelta más al obxectivu fundamental de la nuestra asociación, esto ye, l’asturllionés en Llión. Tratóronose asuntos lingüísticos y literarios qu’espertoron l’interés del públicu, que s’averóu al Palaciu del Conde Lluna en númberu de 80, 44, 58 y 99 personas nos vienres respectivos. Sicasí, ye una llástima que nas dos conferencias centrales nun hubiera más xente, porque la relevancia de los temas trataos y la fondura cola que se fizo, yeran ocasión p’amostrar ─y demostrar─ que la sociedá llionesa tien un interés real pola llengua y qu’esti apreciu va acullá de lo simplemente identitario o simbólico, cumo podrié ser el que se tien polos pondones, el mastín, los aluches, la cecina, el butiellu… o quisióu, pero paez qu’ontavié nun lleguemos a esi estáu: una tristura. La d’esti añu fuei la octava vuelta que los Calechos d’hibiernu son entamaos pola Asociación Faceira conxuntamente col Ayuntamientu de Llión, dando continuidá, asina, a esta serie añal d’actividades sobre cousinas d’iquí qu’escomencemos en solitario y que, con esta, llegóu yá a la novena edición.
El die 6 de febreiru escomenzóu el ciclu cola conferencia de José Ramón Morala, quien analizóu muestras textuales de distintas datas pa intentar establecer la relación que tuvo’l llionés colas outras llenguas del noroeste ibéricu, onque principalmente col castellanu. Pa ello utilizóu exemplos documentales de los sieglos XIII, XV y XVII y, con ellos, pudo amostrar el xeitu de coexistencia lingüística que presentoron dambas llenguas romances a lo llargo de dalgunas centurias. A lo cabeiro de la sua intervención, Morala formulóu una hipótesis: a diferencia de casos cumo’l gallegu en Galicia, l’alta escolarización de la provincia de Llión podrié ser causa del gran acastellamientu sufríu nos sieglos XIX y XX.
Na sua conferencia del 13 de febreiru, Iván Cuevas resaltóu que la visión que tenemos de la literatura n’asturllionés de Llión na actualidá está condicionada pol desconocimientu, la falta d’investigación y la repetición de tópicos. Si emprincipiamos a buscar acullá de lo yá sabío, nun ye difícil atopar datos que ruempen los consensos establecíos sobre una escritura mínima, aislada y centrada nunas comarcas mui concretas. Más qu’una historia al usu, Cuevas ofrecíu una serie d’apuntamientos sobre textos inéditos, conexiones desconocidas, caracterizaciones sociales y xeografías ensin explorar, que nos ayudan a tener una conocencia meyor de la literatura en llionés. Sorprende saber que se tien anuncia de 310 autores y autoras y, tamién que, dende’l 1980 hasta’l 2025, se publicoron na rexón llionesa 132 volúmenes n’asturllionés dafeichu o con una presencia mui significativa de la llengua. A mayores, Cuevas revelóu l’autor de las Cartas a Gallardo en dialecto babiano, textu qu’hasta agora permanecía anónimu, pero que ye obra d’Agustín García de Atocha. La conferencia puede vese y ouyise nel enganche siguiente: https://www.youtube.com/watch?v=gGRU0-iZF48
Na conferencia de Fernando Álvarez-Balbuena, el 20 de febreiru, fizose una revisión de la zonificación del asturllionés occidental que, limitada al norte del espaciu lingüísticu asturllionés, publicóu Diego Catalán na revista Romance Philology, de la Universidá de California, entre los años 1956 y 1957. Dispués de revisar críticamente los métodos utilizaos por Catalán, resumiéronse los sous resultaos y describíuse l’acceptación xeneralizada que tuvieron entre la comunidá científica. Siguidamente, repasóronse críticamente las zonificaciones posteriores –parciales o integrales– del asturllionés occidental, basadas na inicial de Catalán, hasta llegar al estáu de la cuestión actual. Con base principal nun trabayu de campu feichu sistemáticamente a lo llargo d’unos cuantos años n’Esturias, Llión, Zamora y Bregancia, xustificouse la necesidá d’añader a lo menos una zona más n’Esturias y procedíuse a estender los criterios zonificadores de Diego Catalán a la totalidá del asturllionés occidental, describiendo las distintas combinaciones de resultaos que determinan la caracterización de las diferentes zonas dialectales occidentales. Nesti sentíu, díuse una atención particular a las zonas “descubiertas” d’esta manera nas provincias de Llión y Zamora y no districtu de Bregancia, presentouse una cartografía aproximativa que permitiera visualizar la xeografía d’esa zonificación, y, cumo conclusión, fízose una interpretación histórico-xeográfica del mapa presentáu, a fin de xustificar la formación de la xeografía dialectal actual del asturllionés occidental.
La xornada n’homenaxe a Xuan Bello, el 27 de febreiru, ayudóu a divulgar la sua obra y figura na capital llionesa y tuvo cumo obxectivu principal resaltar la vinculación familiar y literaria del escritor cola provincia de Llión. Nesti sen, l’actu escomenzóu cola lectura de dalgunos cachos del sou relatu Las dúas caras de la lluna (Xeitu, abril del 1999), onde Bello se reconoz a sí mesmu cumo asturllionés. L’homenaxe sirvíu tamién pa reivindicar la unidá del dominiu lingüísticu asturllionés y pa recordar dalgunas de las puentes culturales que unen Llión con Esturias. Entre outros textos, Alberto Flecha, Beatriz Blanco Fontao y Antonio Manilla lleron “Laberintos de tinta y papel” (d’Hestoria Universal de Paniceiros), En el Puerto de Piedrafita (poema de Manilla), Nun puedo subir al puertu y “Un didu encuxáu” (d’Unas poucas cousas guapas), onde Bello respuende a la pregunta de por quéi escribir n’asuturlliones occidental. N’estrenu absolutu, Diego Gutiérrez cantóu los pemas de Bello La Casa, A la solombra d’una zrezal y Una xarra griega, zarrando esta prestosísima sesión con un cantar sobre’l poema Emigrantes, d’Eva González.