Asociación Cultural Faceira

Participación de Faceira nas «II Xornaes de Normalización Llingüística nos Conceyos»

L’Ayuntamietu de Xixón convidóu a l’Asociación Cultural Faceira a participar nas II Xornaes de Normalización Llingüística nos Conceyos  entamadas pola Oficina de Normalización Llingüística de Xixón cona ponencia «El llionés: marxinación, desprotección ya inicitivas privadas pa la súa recuperación» que se presentóu’l pasáu llunes 13 d’outubre.

Na ponencia’l nuesu representante Nicanor García Álvarez falóu sobro los sistemáticos incumprimientos del art. 5.2 del Estatutu d’Autonomía de Castiella y Llión ou de la Carta Europea de las Llenguas Rexonales ou Minoritarias del Conseyu d’Europa, y señalóu las propuestas y prioridades más urxentes pa la promoción del llionés y la súa introducción no enseñu.

 Tamién houbo tiempu pa repasar las iniciativas de la nuesa asociación pa la recuperación de la llengua, cumo las publicaciones, los eventos, filandones, la representación ante diversas instituciones y la presencia on-line.

 La ponencia tuvo una acoyida muito buena, con bien de perguntas y muitu interés por parte’l públicu asistente entre los qu’estaban presentes autoridades locales y representantes de las oficinas de normalización lingüística de varios conceyos.

Crónica del V Filandón Bercianu: Santa Marina de Torre.


Qué difícil resumir todu’l cariñu y las atenciones que tuvimos no V Filandón Bercianu en Santa Marina de Torre.

La “Casa Museo” de Santa Marina (un sitiu con un encantu especial, un gran descubrimientu) ye un sitiu pequeñín n’espaciu pero enorme en trabayu comunal y sentimiento de pertenencia. Un sitiu no que presta estar y no que la Asociación Cultural la Carqueixa demuestra que con trabayu y  xunidá, todu ye posible, como organizar eventos culturales nun pueblín bercianu, o defender la cultura llionesa llevando a xente de tódala contorna a sentir falar en llionés d’hestioria y toponimia a un sitiu tan guapu como Santa Marina.

Dempués de la presentación del evento por parte de la A.C. la Carqueixa, entamóu’l filandón cono presidente de Faceira, Ricardo Chao falando de la historia de Llión.

Dempués Fernando Álvarez Valbuena (xunto conos  asistentes al filandón) repasoron la toponimia  berciana nun filandón tan prestosu como participativu.

La A.C la Carqueixa tuvo el gran detalle de facenos un regalu guapísimu: Una boina cono escudu’l pueblu. ¡Muitas gracias, compañeiros!

Y como siempre rematamos con castañas, vinu y música: Fernando y el resto del grupu “Aires del Pilar de La Ribera” Cantoron, bailoron y ficienon bailar a la xente poniendo’l ramu a uno de los filandones más prestosos y participativos de las cinco ediciones.

 

 

 

 

 

 

 

 

 

 

 

 

 

Gracias al pueblu de Santa Marina por facenos sentir en casa. Entamamos ya a trabayar pa que’l VI filandón bercianu seya  igual de prestosu.