Asociación Cultural Faceira

CALECHOS D’IVIERNU 2023: Con mirada de muyer

El vienres 3 de febreiru escomienzan las xornadas culturales tituladas Calechos d’iviernu, entamadas pola Asociación Cultural Faceira y la Conceyalía d’Acción y Promoción cultural del Ayuntamientu de Llión. Anguaño tienen cumo eixe temáticu la muyer en Llión y el sou papel na historia, na arquitectura tradicional y na tresmisión de la música de tradición oral, conteníos que vienen a completase con una conferencia d’apertura, d’asuntu ecolóxicu y igualmente realizada por una muyer, sobre la conservación del urogallu cantábricu.

El calechu yera una reunión típica de los pueblos de la montaña noroccidental llionesa, concretamente de las comarcas de Ribas de Sil, Ḷḷaciana, Babia, Oumaña, Ḷḷuna, Ordás y El Bierciu, onde se conoz cono nome de caleyu. Al cabu la tarde, axuntábanse varios vecinos y/ou achegáos na calle –se’l tiempu lo permitía– ou na cocina d’unu d’ellos, cono propósitu de pasar d’un xeitu prestosu un buen ratáu antias de cenar nas llargas tardes d’iviernu, estación na qu’había menos que facer que n’outras épocas del añu. Parez que tantu’l vezu cumo’l términu tienen el sou orixe nas xuntanzas que se facían antaño pa repartir las velías de caltenimientu, cebáu y andar al pesque de las trapas pa llobos, chamadas calechos, asina cumo determinar outros detalles d’ellas. El calechu yera principalmente una tertulia na que se comunicaban las anuncias de la vida diaria, anque tamién podía xugase a las cartas y contase historias divertidas, cuentos y cosillinas, estas últimas dedicadas especialmente a los rapaces. Tamién yera’l momentu no que s’acordaba áu s’axuntarían pola nueite pal filandón anque, estremáu d’ésti, no calechu nun se solía trabayar y, por tanto, tenía un aquel mayormente lúdicu, d’ehí’l protagonismu de la xente moza en muitos casos. Pero amás d’engayolar, dacuando’l calechu tenía un llau pedagóxicu, yá que yera aproveitáu polos padres pa deprender a los sous fiyos cousas de la escuela.

Cona celebración de los Calechos d’iviernu, l’Asociación Cultural Faceira y la Conceyalía d’Acción y Promoción Cultural del Ayuntamientu de Llión non solo rinden homenaxe a esta costume, senon qu’intentando xuntar esparcemientu y educación, buscan emponderar y difundir una parte del gran patrimoniu cultural llionés al traviés de trés conferencias y una charla-conciertu que serán protagonizadas por siete muyeres llionesas baxo’l siguiente programa:

03/02/2023. Beatriz Blanco Fontao (Santa Lucía, Llión): «Los últimos feisanes».

10/02/2023. Teresa García Montes (Viguillina, Llión): “Espacios femeninos na arquitectura tradicional llionesa”.

17/02/2023. Miryan Rodríguez San José (Ponferrada, Llión): “Muyeres na historia de Llión”.

24/02/2023. Carmen Marentes, Yolanda García, Amanda Alvarez y Laura Collar (Ḷḷaciana, Llión): “La muyer y la tresmisión de la música de tradición oral” (Charla-Conciertu).

Tódalas intervenciones son de vienres ya principian a las 19:30 horas no Palaciu del Conde Ḷḷuna (Praza del Conde Ḷḷuna, 24003, Llión)

Dirección y coordinación: José Ignacio Suárez García

Carmilla, la novela qu’inspiróu a Bram Stoker na creación de Drácula, agora disponible en llionés

La obra inaugura la colección Lletras Universales de la nuesa asociación baixo’l sellu d’Eolas Ediciones. Esta novela curtia, publicada pol irlandés Joseph Sheridan Le Fanu en 1872, anuévase nuna traducción al llionés realizada por Xairu López, con ilustraciones de Ricardo Escobar y prólogu de Laura Collar. La obra presentaráse nos próximos días en Llión, Uviéu y Xixón.

Esta novela curtia, publicada en 1872 pol escritor irlandés Joseph Thomas Sheridan Le Fanu, foi traducida al llionés por Xairu López, autor de La Fueya Rota y outros relatos (2020). La obra, foi amás prologada por Laura Collar y ilustrada pol artesanu gráficu Ricardo Escobar, que ya contribuyera conas suas ilustraciones a numerosas publicaciones cumo Llión Máxicu, Los Reis de Llión ou Esbardu, vocabulariu llionés ilustráu.

Esta traducción, publicada por Eolas Ediciones, inaugura la colección Lletras Universales cona que la nuesa asociación finca l’obxectivu de poner a disposición de los lectores dalgunas de las obras más relevantes de la literatura universal traducidas a la llengua llionesa.

La novela curtia Carmilla ye una de las principales fontes de las que bebíu Bram Stoker pa crear la que quiciabes sía la figura más universal del terror fantásticu: Drácula. Esta inquietante historia de vampiros presenta por primer vez a estos cumo seres elegantes y atractivos, del mesmu xeitu aborda’l tema del erotismu y amor lésbicu nuna época na que la’argumentu abultaba fondamente controvertíu. La trama narra la historia de Laura y sou padre, habitantes d’un vieyu castiellu n’Estiria (Austria) xunto a los sous sirvientes. La sua tranquila y monótona vida cambia de repente cuando, frente a ellos, un carruaxe ocupáu por una muyer y por Carmilla, la sua formosa y xoven fiya, sufre un aparatosu accidente. Tres la decisión del padre de Laura de que la enigmática Carmilla quede no castiellu xunto a ellos hasta alitar del sucesu, ruchará entre las xovenes una relación d’amistá que trescala la llinia del más apasionáu amor en metá d’una riestra d’alarmantes feitos que xiran alredor del comportamientu de la recién chegada.

El llibru ya puede adquirise online a traviés de www.eolasediciones.com y está disponible en cualquier llibrería de referencia.

PRESENTACIONES

Resume Calechos d’iviernu n’homenaxe a Eva González

Cumo nun podía ser d’outra manera, l’andanciu de COVID-19 marcóu la edición de los Calechos d’iviernu, entamaos por cuarta vuelta pola Asociación Faceira conxuntamente cono Ayuntamientu de Ḷḷión, dando continuidá, asina, a esta serie de actividades añales sobre cousinas d’eiquí que cheganon yá a la quinta edición.

Escomencipióu’l ciclu’l 6 de marzu del 2020 con una conferencia na que’l fichu de la homenaxeada, Roberto González-Quevedo, introdúxonos en requeixos pouco conocíos d’Eva cumo escritora, siempres dende una perspectiva fonderamente humana que chegóu a emocionar a un públicu que chenóu completamente la sala, hasta alcanzar el cientu’l númaru d’asistentes.

Malapenas una sumana espués, hubo qu’atachar la edición por mor del confinamientu, yá que quedanon aparadas tódalas actividades presenciales. Asina, tuvo que se retomar el restu del ciclu no mes de febreiru del 2022, cona capacidá máxima de la sala limitada namás qu’a 40 personas. Na primer actividá, una mesa redonda sobre «El xurdimientu literariu del ḷḷionés», Xairu López, Francisco González-Banfi, Rubén García ya Iván Cuevas reflexionanon ya expusienon los sous respectivos puntos de vista sobre’l sentíu d’escribir actualmente en ḷḷionés, qué facer pa incentivar la producción nesta ḷḷingua, qué papel tien que xugar cumo elementu de normalización lingüística, qué temáticas deben abordase na literatura en ḷḷionés, cuála yía la situación al respective de los sous estudios, cuálas son las influencias de la literatura casteḷḷana ya asturiana na literatura ḷḷionesa, qué fórmulas podrían manexase d’empléu del ḷḷionés n’obras escritas en casteḷḷanu, cuála yía la situación en Zamora ou cuála yía la súa valoración de la producción d’Eva Gonzalez, entre outros temas. La sala chena, ya eso qu’esi día había na ciudá muito bien d’actividades a la mesma hora, entre eḷḷas, un conciertu, una conferencia de música ya la presentación d’un ḷḷibru sobre l’autonomía de Ḷḷión.

Nicolás Bartolomé fixo un repasu sobre «El xurdimientu literariu del ḷḷionés (1980-2020)», una miente que tien trabachada abondo ya que foi obxetu recién d’una publicación (CELe, 2021). Na súa briḷḷante conferencia, Bartolomé encalcóu la importancia de la producción ḷḷionesa de los últimos cuarenta anos ya cúmo ésta sigue medrando na actualidá, con bien de nomes que convidan a pensar en positivo ya con ciertu optimismu. La sala chena casimente: 37 personas.

El grupu musical D’Urria, compuestu por José Manuel Sabugo ya Dani Álvarez, tocóu un conciertu no que pudimos oyir mui bien de cantares con ḷḷetra ḷḷionesa d’Eva González ya Emilce Núñez, entre outros autores. El públicu, que chenóu la sala, salíu contentísimu ya emocionáu espués de sentir los sones ya los cantaríos oufrecíos por estos músicos excelentes.
Réstanos, namás, da-ḷḷy las gracias a tódolos intervinientes ya, tamién, a tódolos asistentes a las charlas, naguando porque foran del sou interés ya convidándo-ḷḷys tamién a qu’acudan a la próxima edición, que yá tamos entamando.

Carta remitida al Ministro de Cultura Miquel Iceta denunciando la discriminación del leonés y del gallego en León

Los Presupuestos Generales del Estado de 2022 recogen una enmienda presentada en el Senado por el partido político Compromís, orientada a la promoción de las lenguas españolas protegidas por la Carta Europea de las Lenguas Regionales o Minoritarias del Consejo de Europa. El 11 de enero de 2022 el Ministro de Cultura y el senador de Compromís Carles Mulet, concretaron que el destino de la partida aprobada, de 1,6 millones de euros, sería dedicada a acciones de promoción y difusión tanto de las lenguas propias de España, como del plurilingüismo, y a mejorar el conocimiento de la diversidad lingüística y cultural de nuestro país. Especificándose además la transferencia de ese dinero a las Comunidades Autónomas a la mayor brevedad posible.

A pesar de que la enmienda busca apoyar a las lenguas protegidas por la Carta Europea de las Lenguas Regionales o Minoritarias, las partidas económicas y las acciones de promoción previstas solo van a dedicarse a las lenguas propias de Galicia, Asturias, País Vasco, Navarra, Aragón, Cataluña, Comunidad Valenciana e Islas Baleares, quedando fuera las lenguas minoritarias protegidas por el Estatuto de Autonomía de Castilla y León, el leonés y el gallego, conforme establece los párrafos 2 y 3 del artículo 5 de la Ley Orgánica 14/2007, de 30 de noviembre, de reforma del Estatuto de Autonomía de Castilla y León:

2. El leonés será objeto de protección específica por parte de las instituciones por su particular valor dentro del patrimonio lingüístico de la Comunidad. Su protección, uso y promoción serán objeto de regulación.
3. Gozará de respeto y protección la lengua gallega en los lugares en que habitualmente se utilice.

Conforme a la legislación vigente, Faceira entiende en el reparto de los fondos señalados ha de incluirse también la promoción del leonés y del gallego en Castilla y León. No tener esto en cuenta supondría una arbitrariedad y una nueva discriminación para los hablantes de leonés y de gallego, ya que ambas lenguas están reconocidas estatutariamente y entran dentro del ámbito de protección del referenciado tratado internacional promovido por el Consejo de Europa. Especialmente grave es la situación de la lengua leonesa, desatendida de manera absoluta por la Junta de Castilla y León, ausente por completo del sistema educativo de la Comunidad y que carece de las medidas de promoción, protección y fomento del uso que los mandatos del art. 5.2 del Estatuto de Autonomía obligan a implementar a las instituciones autonómicas.

VUELVEN LOS CALECHOS D’IVIERNU 2020, HOMENAXE A LA ESCRITORA EVA GONZÁLEZ

Cartel de los Calechos d'Iviernu 2020

El vienres 4 de febreiru escomencipian las xornadas culturales tituladas Calechos d’iviernu, entamadas pola Asociación Cultural Faceira ya l’Ayuntamientu de Ḷḷión. Aguano continúase la edición aparada no 2020 por mor del andanciu de Covid-19, asina qu’esti añu’l ciclo retoma’l proyectáu homenaxe a la escritora ḷḷionesa Eva González (2018-2007). No 2020 cumplíanse 40 anos de la publicación del ḷḷibru Poesías ya cuentus na nuesa l.lingua (1980), escritu por Eva González Fernández ya’l sou fichu Roberto González-Quevedo González, que foi’l primer volume d’una importante producción literaria que revitalizóu la escritura d’esta viecha ḷḷingua non solo no noroccidente ḷḷionés, senón tamién no restu de Ḷḷión ya no occidente asturianu, onde estos autores palaciegos ḷḷogranon una enorme popularidá. Con estos Calechos d’iviernu 2022 dedicaos a la memoria d’Eva González, queremos poner en valor la sua obra pola sua excepcional importancia na recuperación del cultivu escritu de la nuesa ḷḷingua.

El calechu yera una reunión típica de los pueblos de la montaña noroccidental ḷḷionesa, concretamente de las comarcas de Ribas de Sil, Ḷḷaciana, Babia, Oumaña, Ḷḷuna, Ordás ya El Bierciu, onde se conoz cono nome de caleyu. Al cabu la tarde, axuntábanse varios vecinos ya/ou achegáos na caḷḷe –se’l tiempu lo permitía– ou na cocina d’unu d’eḷḷos, cono propósitu de pasar d’un xeitu prestosu un buen ratáu antias de cenar nas ḷḷargas tardes d’iviernu, estación na qu’había menos que faer que n’outras épocas del anu. Parez que tantu’l vezu cumo’l términu tienen el sou orixe nas xuntanzas que se faían antano pa repartir las velías de caltenimientu, cebáu ya andar al pesque de las trapas pa ḷḷobos, chamadas calechos, asina cumo determinar outros detaḷḷes d’eḷḷas. El calechu yera principalmente una tertulia na que se comunicaban las anuncias de la vida diaria, anque tamién podía xugase a las cartas ya contase historias divertidas, cuentos ya cousiḷḷinas, estas últimas dedicadas especialmente a los rapaces. Tamién yera’l momentu no que s’acordaba áu s’axuntarían pola nueite pal filandón anque, estremáu d’ésti, no calechu nun se solía trabachar ya, por tanto, tenía un aquel mayormente lúdicu, d’ehí’l protagonismu de la xente moza en muitos casos. Pero amás d’engayolar, dacuando’l calechu tenía un ḷḷau pedagóxicu, yá que yera aproveitáu polos pais pa deprender a los sous fíchos cousas de la escuela.

Cona celebración de los Calechos d’iviernu, l’Asociación Cultural Faceira ya la Conceyalía d’Acción ya Promoción Cultural del Ayuntamientu de Ḷḷión non solo rinden homenaxe a esta costume, senon qu’intentando xuntar esparcemientu ya educación, buscan emponderar ya difundir una parte del gran patrimoniu cultural ḷḷionés al traviés de una conferencia, un conciertu ya una mesa redonda alredor de la escritora Eva González ya la producción literaria en ḷḷionés con esti programa:

04/02/2022. Mesa redonda: “La creación literaria en ḷḷionés: presente ya futuru”.

  • Xairu López (Ḷḷión)
  • Francisco González-Banfi (Palacios, Ḷḷión)
  • Rubén García (Zamora)
  • Iván Cuevas (Xixón, Asturias)

11/02/2022. Nicolás Bartolomé (Ḷḷión): “El xurdimientu literariu del ḷḷionés (1980-2020)”.

18/02/2022. José Manuel Sabugo Álvarez ya grupu D’urria (Ḷḷaciana, Ḷḷión): “La nuesa ḷḷingua puesta en música” (Conciertu).

Tódalas intervenciones son de vienres ya principian a las 19:30 horas no Palaciu del Conde Ḷḷuna (Praza del Conde Ḷḷuna, 24003, Ḷḷión)

Dirección ya coordinación: José Ignacio Suárez García

Resume Calechos d’iviernu de 2019

«In crescendo». Esti podría ser el titular d’un diariu pa resumir los Calechos d’iviernu de 2019, que terminoron el pasáu vienres 22 de marzu. Por tercer vez foron entamaos pola Asociación Faceira conxuntamente cono Ayuntamientu de Llión, dando continuidá, asina, a esta serie de conferencias añales sobre cousinas d’eiquí que, cona presente, chegoron yá a la cuarta edición.

El titular d’enantes, «In crescendo», débese principalmente a trés cousas. En primer llugar, al incrementu d’asistentes, que pasoron de las 175 personas alcanzadas nas sesiones de 2018, a las 194 d’aguaño, lo cual supón un incrementu de casi un 11% respetive al añu pasáu, y esu a pesar de que dalguna de las conferencias coincidíu con outras actividades que, ensin duda, restoron públicu. Lo dicho confirma la tendencia que señalemos no nuesu postrer resume, ye dicir, que’l ciclu definitivamente queda asentáu cumo una actividá cultural bien del gustu de los llioneses, polo cual creyemos qu’estamos de norabuena. Outra cousa a tener en cuenta ye que, respetive al añu anterior, el númaru de xente que acudíu a las charlas foi muitu más constante, con cifras que’n tódolos casos superoron los 40 asistentes y con un promedio de 48,5 personas por conferencia. Finalmente, y pareznos el mayor llogru, la participación de la xente foi espectacular. Tanto ye asina que tódolos días l’encargáu del Ayuntamientu tuvo que zarrar l’edificiu más tarde de las nueve la nueite (hora oficial), viéndonos na obrigación de dar por terminadas las cuatro sesiones enantes de que pudieran expresase tódalas inquietudes que las intervenciones de los conferencianes despertaran entre’l públicu. Dende estas llinias queremos da-y las gracias al personal que, de xeitu tan xenerosu, atendíonos no Palaciu Conde Luna.

Cona sala chena (55 personas), David Álvarez Carcamo trazóu un panorama xeneral sobre la tradición oral en Llión. Con unas excepcionales dotes comunicativas, Álvarez tocóu temas cumo qué ye la tradición oral, ónde aparez y quiénes son los sous transmisores y depositarios. Despuéis, encalcóu que la provincia de Llión ye un casu especialmente ricu y bien documentáu, anque, sicasí, quedan muitas cousas por facer. Y ye que, a pesar de la importancia d’esi ricu patrimoniu inmaterial, gran parte de los archivos sonoros que rexistran toda esa tradición oral nun estan disponibles entovía n’abiertu pa todu’l mundu. Na última parte de la sua conferencia, chamóu l’atención sobre la necesidá de siguir recoyiendo los postreiros borrayos de la tradición viva, poner a disposición de la xente materiales d’audio y vídeo, crear estratexas d’esparcimientu cona colaboración d’instituciones y el mundiu del enseñu y, por últimu, entamar un archivu únicu qu’ arrequede los esfuercios individuales.

Con dalgo menos d’entrada (43 personas), por coincidir cona manifestación del 8 de marzu, Andrés Altés Domínguez falóu sobre’l discursu esencialista montáu sobre la corona de Castiella, el cual foi entamáu en gran medida por oposición al reinu de Llión. De reiz medieval y literaria, esta construcción historiográfica sufríu un fuerte emburrión no pasu de los siegros XIX al XX, de manu de personalidades cumo Joaquín Costa ou Ramón Menéndez Pidal, chegando a un puntu cimeiru cona dictadura de Franco, y la celebración, en 1943, del milenariu de la supuesta independencia del condáu de Castiella del reinu de Llión, dalgo calteníu despuéis na Posguerra franquista. Aguaño, va tiempu qu’esti mitu está desmontáu pola historiografía, pues ye bien conocíu que la mentada independencia nun foi tal hasta pasada la segunda mitá del siegru XII. Sicasí, esti xeitu de discursu esencialista, sobre una Castiella resume de tódolos valores positivos de «la nación española», tristemente pervive na literatura non académica, onde tamién se caltién el mitu de la independencia de Castiella no siegru X. El conferenciante ilustróu la sua exposición con fotos bien prestosas, asina cumo con un exemplu buenísimu sacáu de la película «El valle de las espadas» (1963).

La conferencia de Santiago Pérez Fernández, «Rasgos del llionés na fala y toponimia d’Antoñán», contóu cona presencia de 49 personas. D’un xeitu craru y didácticu Pérez establecíu los ragos principales de la fala del sou llugar de ñacencia respetive al vocalismu, al consonantismu, a la morfoloxía y a la sintaxis. El públicu reconocíuse dafeitu cono dicho al comprobar las asemeyanzas con outras zonas de fala llionesa y, nesti sen, no debate final hubo quien arremellóu al decatase de que la fala tradicional d’Al Fabeiru (El Bierciu) nun ye’l gallegu, senon l’asturllionés. Dende lluegu, el llabor que queda por facer nesa parte de Llión ye toda, porque’l desconocimientu entre la xente ye total. Outramiente nun ayuda pa ello la postura adoptada pol Conseyu Comarcal, que nun ta faciendo nada por poner en valor una de las suas llenguas tradicionales.

Zarróu la serie Carlos Javier Salgado Fuentes, qu’ante 47 personas fizo un repasu de la esbarrumbada situación llionesa actual. Tras recordar qué ye y cuáles son los dereitos de la rexón llionesa, asina cumo los problemas habíos na creación de «Castilla y León», constatóu qu’un fuerte desapegu a l’autonomía sigue plenamente vixente nas tres provincias llionesas, y especialmente en Llión, onde’l rechazu al ente administrativu supera’l 50% de la xente, según datos de la postrer encuesta d’Electomanía (xineiru de 2019). Na segunda parte de la conferencia, encalcóu la desastrosa evolución económica y demográfica de la rexón llionesa dientro de l’autonomía (1983-2018), una situación que pinta pior, entovía, al facer la comparanza cona parte castellana del territoriu. Nesti sen, chamóu poderosmente l’atención del auditoriu que, pa esi periodu, Castiella perdíu numás que’l 2% de la sua población, mientras que Llión perdiú’l 13%. Visto n’outros términos, la rexón llionesa contabilizóu’l 82% de la pérdida de población de toda l’autonomía, lo cual supón la pior evolución de todo’l Estáu. Datos sobre’l desigual repartu de recursos entre las dúas rexones que componen l’autonomía (funcionarios, infraestructuras, etc.) y outros sobre la mengua de población y poder políticu, asina cumo sobre despoblación, enveyecimientu, paru llaboral, renta per cápita, PIB, emigración, etc., llevoron a Salgado a proponer la creación d’una autonomía llionesa cumo meyor solución pa manexar los recursos propios, pa poder optar a ayudas europeas y priorizar las relaciones con Extremadura, Asturias, Galicia y Portugal.

Réstanos, numás, da-ys las gracias a tódolos conferenciantes y, tamién, a tódolos asistentes a las charlas, naguando porque fueran del sou interés y convidándo-ys, al mesmu tiempu, a que siguan siendonos fieles na próxima edición, que yá estamos entamando.

Hasta’l próximu añu.

Filandón Mitolóxicu en Cazurra Brew Pub

El próximu vienres, 28 de diciembre de 2018 a las 20,30 horas, la nuesa asociación desenvolverá en Cazurra Brew Pub, fábrica de cerveza artesana asitiada na Calle Arquitecto Lázaro 6 de Llión (xunto a la muralla de Puerta Moneda), un Filandón Mitolóxicu onde faremos un curiosu repasu a una buena pila de personaxes mitolóxicos llioneses que de xuru prestará pola vida.

La entrada será llibre hasta chenar aforu. ¡Nun vos lo perder!

CRÓNICA DEL VI FILANDÓN BERCIANU EN BEMBIBRE

Queremos principiar esta crónica dando las más fonderas gracias a la corporación de Bembibre y especialmente a la conceyala de cultura Doña Laura Álvarez Alonso, por poner a la nuesa disposición un entornu tan impresionante cumo la Casa de las Culturas y sobremanera pola sua implicación y participación no Filandón.

Entamóu’l filandón con Alberto Flecha falando de la organización territorial de la nuesa tierra a lo llargo la historia. El públicu asistente foi muitu participativu “interrumpiendo” a Alberto interesándose por bien de detalles de la sua exposición.

L’ilustrador de Llión Máxicu y Esbardu. Vocabulariu llionés ilustráu, el nuesu compañeiru Ricardo Escobar, desplicóu el sou trabayu apoyándose con cuentos tradicionales que falaban de los seres mitolóxicos presentes n’estos dous prestosos llibros.

Fernando Álvarez-Balbuena deixónos a todos plasmaos cona súa sabiduría, detallando las diferentes  formas patrimoniales pa nomar a la villa de Bembibre: MembibreBienbibreBrenbibre, y asina hasta 14 diferentes nomes recoyíos nos sous estudios de campu.

Cumo siempres, rematamos el filandón con música. Fran Allegre garróu la chiflfa y la zanfoña pa echar un par de cantares bien prestosos

Entamamos ya  cona preparación del VII filandón Bercianu.

Las diez palabras llionesas más formosas

En 2018 dúas ciudades, Ljouwert/Leeuwarden (Frisia, Países Baixos) y La Valeta (Malta), van ser Capitales Europeas de la Cultura, y una de las iniciativas que se van desenvolver en Ljouwert ye un Pabellón de las Llenguas no que s’expondrán las diez palabras llionesas más formosas, que s’escoyerán nuna campaña en redes sociales.
El colectivu de promoción de la llengua frisia Afûk coordina esta actuación de celebración de la diversidá lingüística aproveitando la repercusión mediática de la capitalidá europea. Dende’l 30 de marzu hasta’l 28 d’outubre, las llenguas europeas van ser protagonistas no Talepaviljoen (Pabellón de las Llenguas), que forma parte del proyectu Lân fan tala (Tierra de Llenguas) de la Capital de la Cultura Europea 2018 en Ljouwert/Leeuwarden. No teitu del Pabellón van colocase palabras de muitas llenguas minoritarias, y onde tamién tendrá presencia la llengua llionesa.
Dende Afûk contactoron con Faceira pa participar nesa iniciativa, y l’asociación decidíu entamar una campaña en redes sociales pa que sían los llioneses quien escueyan las palabras llionesas que van ponese no Pabellón de las Llenguas, polo qu’animamos a tódalas personas interesadas a participar proponiendo las suas palabras preferidas, y a que las remitan enantes del 12 de marzu a l’Asociación Cultural Faceira a traviés del corréu electrónicu ou de las cuentas abiertas en Twitter ou Facebook de la propia asociación col hastag #PalabrasFormosas.

Conclusiones finales foru «Carta Europea para as Linguas Rexionais ou Minoritarias»

Apurrímovos el documentu no que se recueyen las conclusiones finales del foru celebráu l’últimu san Xuan en Santiagu no que estuvo presenta Faceira. No documentu podemos atopar las conclusiones xenerales del foru  no tocante al llionés y a las demás llinguas minorizadas.