Asociación Cultural Faceira

Etiqueta: palabras

LAS DIEZ PALABRAS LLIONESAS MÁS FORMOSAS

Las palabras de la nuesa llengua que van representar a Llión y al llionés na ciudá Frisia de Ljouwert, Capital Europea de la Cultura 2018, son:

facendera, fervienza, filandón, llariega, llumbreiru, panxulina, prestar, señardá, telar y xeitu

Queremos dar las gracias a toda la xente que participóu na campaña de busca de las diez palabras llionesas que van representar a la nuesa llengua no Talepaviljoen (Pabellón de las Llenguas) en Ljouwert/Leeuwarden (Frisia, Paises Baxos), Capital de la Cultura Europea 2018. De los cientos de palabras que nos remitieron escoyimos las siguientes polos motivos qu’apuntamos darréu:

Elixidas por ser las más votadas y de gran usu en llionés y tamién no castellanu rexonal de Llión

 

PRESTAR: Gustar, agradar, satisfacer.

TELAR: Máquina pa texer, pero en sentíu figuráu y en plural refierse a un asuntu complicáu ou a una dificultá.

Elixidas por facer referencia a aspectos de la cultura llionesa

 

FACENDERA: Trabayu en común de los vecinos d’un llugar pa facer pequeñas obras d’interés xeneral.

FILANDÓN: Xuntanza ivernal y nocturna de muyeres pa filar na que se solían contar cuentos, cantar, recitar romances y a veces hasta baillar.

LLARIEGA: En sentíu literal ye la zona del suelu de la cocina onde se facía’l llume pa cocinar nas casas tradicionales llionesas, pero metafóricamente designa tamién a la propia vivienda.

Elixidas pola sua sonoridá, singularidá  ou formosura

FERVIENZA: Desnivel pronunciáu nun cursu d’augua. [Fai referencia a que l’augua al cayer parez ferver pol sou soníu y las burbuxas que produz].

LLUMBREIRU: Tea d’uz p’allumar. [Sistema antigüu d’iluminación nas zonas rurales llionesas antias de xeneralizase la electricidá]

PANXULINA: Insectu lepidópteru que normalmente tien dous pares d’alas grandes, escamosas y de colores que rescamplan. [Ye unu de los muitos nomes que tien esi insectu en Llión, y de los más forrmosos].

SEÑARDÁ: Melancolía, tristura, emoción, sentimientu de soledá.

XEITU: Mou, aspectu, compostura. [Ye una palabra con una fonética típicamente llionesa, y con un significáu difícil de traducir al castellanu ou a outras llenguas].

Las diez palabras llionesas más formosas

En 2018 dúas ciudades, Ljouwert/Leeuwarden (Frisia, Países Baixos) y La Valeta (Malta), van ser Capitales Europeas de la Cultura, y una de las iniciativas que se van desenvolver en Ljouwert ye un Pabellón de las Llenguas no que s’expondrán las diez palabras llionesas más formosas, que s’escoyerán nuna campaña en redes sociales.
El colectivu de promoción de la llengua frisia Afûk coordina esta actuación de celebración de la diversidá lingüística aproveitando la repercusión mediática de la capitalidá europea. Dende’l 30 de marzu hasta’l 28 d’outubre, las llenguas europeas van ser protagonistas no Talepaviljoen (Pabellón de las Llenguas), que forma parte del proyectu Lân fan tala (Tierra de Llenguas) de la Capital de la Cultura Europea 2018 en Ljouwert/Leeuwarden. No teitu del Pabellón van colocase palabras de muitas llenguas minoritarias, y onde tamién tendrá presencia la llengua llionesa.
Dende Afûk contactoron con Faceira pa participar nesa iniciativa, y l’asociación decidíu entamar una campaña en redes sociales pa que sían los llioneses quien escueyan las palabras llionesas que van ponese no Pabellón de las Llenguas, polo qu’animamos a tódalas personas interesadas a participar proponiendo las suas palabras preferidas, y a que las remitan enantes del 12 de marzu a l’Asociación Cultural Faceira a traviés del corréu electrónicu ou de las cuentas abiertas en Twitter ou Facebook de la propia asociación col hastag #PalabrasFormosas.