Miembros de l’Asociación Cultural Faceira reuniéronse’l pasáu 17 de
xineiru de 2024 na sede del Instituto Cervantes en Madrid cono Comité
d’Expertos designáu pol Conseyu d’Europa pal control de l’aplicación
n’España de la Carta Europea de las Llenguas Rexonales ou Minoritarias
(CELRM). En dicha reunión l’Asociación Cultural Faceira presentóu un
informe dirixíu al Conseyu d’Europa no que se detalla’l reiteráu
incumprimientu de la Junta de Castilla y León tanto del artículu 5.2 del
Estatutu d’Autonomía, cumo de la Carta Europea de las Llenguas
Rexonales ou Minoritarias, tratáu internacional subscritu por España y
qu’obriga a adoptar una serie de mididas pa la salvaguarda de las llenguas
españolas, incluyida la llionesa.
El Conseyu d’Europa tampouco recibíu nin de la Junta de Castilla y León
nin del Estáu Español, garante del cumprimientu d’esti tratáu internacional
de defensa de las llenguas minoritarias europeas, la información que se-ys
solicita dende l’añu 2012 sobre la situación del llionés y las mididas
adoptadas pa la sua promoción.
L’informe presentáu pola asociación documenta que Castilla y León
incumpre las obrigaciones que determina’l CELRM pal llionés, pues esta
llengua nun s’ufierta cumo asignatura no sistema educativu de la Comunidá
(artículu 7.1 f y g del tratáu), l’administración autonómica nun despriega
nenguna midida práctica pa la sua promoción (artículu 7.1 c), tampouco se
facilita’l sou empréu oral y escritu na vida pública y na vida privada
(artículu 7.1 d), nin se desarrollóu lexislativamente l’artículu 5.2 del
Estatutu d’Autonomía 17 años despuéis de la sua entrada en vigor (artículu
7.1, parágrafu inicial).
L’informe tamién detalla la política discriminatoria de la Junta de Castilla y
León p’hacia los falantes de llionés, vulnerando’l artículu 7.2 de la
CELRM, y que tien la sua expresión más elocuente no feitu de que de las
tres llenguas qu’empara y reconoz l’Estatutu el Autonomía, la castellana (la
única oficial), la gallega y la llionesa, esta última ye la única que carez de
protección en Castilla y León ou de presencia no sistema educativu de la
Comunidá.
A lo llargo de 2024 el Conseyu d’Europa emitirá dictame con base na
información recoyida pol Comité d’Expertos que visitóu España esti mes
de xineiru.
Pingback: L’Asociación Cultural Faceira informa al Conseyu d’Europa del reiteráu incumprimientu de la Junta de Castilla y León dle artículo 5.2 del Estatutu d’Autonomía y de la Carta Europea de las Llenguas Rexonales ou Minoritarias respective a